Member-only story
呢個星期，有單網聞係咁嘅。有人話，自己出黎做野幾年，都未有入息中位數 兩萬蚊，然後你都預期到，之後留言嘅人，就係一堆講話點解你做左幾年野都冇兩萬蚊，又話你賺唔到錢，就梗係你抵死。另一邊廂，有一個電視台嘅藝員，又話畀我地呢d 八、九十後聽，要買到樓，記得要媽媽幫忙。
2020年，香港入息中位數為$19,000，但有大學畢業生畢業五年後，仍未可高於此薪酬，於網上發文後，引發廣泛討論。有自稱大學畢業生嘅網民表示，已經畢業左5年，但係人工仲好低，得十幾K。他指其他同屆同學的月入已達三至四萬元，真係身邊都冇朋友有咁低嘅人工」，令佢感到好自卑。
我諗起一個故事。有一個做記者嘅朋友，佢真係做左五年，都係兩萬蚊左右。個故事係咁嘅。大概三、四年前，有一個果陣27歲嘅學生，佢係一家新聞台做野，做左好多年，佢30歲之前想結婚，佢老細就同佢講，見你就結婚，就加到你兩萬蚊啦。我先知道，原來出黎做前線記者，而且係做電視記者，可以做左5年，都係未到兩萬蚊嘅。然後你睇返而家嘅物價，一個月兩萬蚊，可唔可以結婚呢？冇父母幫忙嘅話，可唔可以置業呢？
每一次，有學生問我，做新聞好唔好，做記者好唔好，我都好想即時咁答佢：你屋企好有錢架？你屋企冇錢嘅話，你使唔使養家？你捱唔捱到十五年窮？
而早幾日，我又見到 ＃903國民教育 另一個嘉賓阿金嘅ig，佢話有人嘅夢想，就係學好泰文，然後做記者……我個心，就涼左一截。
死啦，阿金，我地有冇害左人？
係所有文章都應該免費，尤其係網媒起家之時，要求內容提供者免費供稿果陣，新聞系嘅老師，記協冇出聲，然後過去咁多年，記者嘅入職人工都咁低，生活都分分鐘捉襟見肘，做老師嘅，點樣去鼓勵學生去做呢份工，而講果陣，個心先唔虛呢？
