Member-only story
成日都睇到好多奇怪既事，我好多朋友，都開始唔敢講出口。因為你講出黎，好多你平時唔識／見過兩次面既面書朋友／網民就走黎屈鳩你，將你說話加入情緒，扭曲，放大，再將你成為箭靶，發洩佢地平日鬱悶既情緒。
呢個現象，我係 903國民教育 第一集既 2017小事回顧 同 威廉 講過，叫 ＃onlymetoo。
即係，而家你有咩想法，都千祈唔撚好寫出黎。因為你寫出黎，d人就會加鹽加醋造鳩你。
好似，一月一日，大家好似忽然好關心樂壇。呢幾年，我真係真心覺得叱咤真係好重要。因為大家都真係會用呢一日，睇下香港音樂圈，仲留返d咩（或者用d娛樂抽水page既說法，叫「仲死剩d咩」）。
唱片唔好賣，老翻當道。佢地搞左「正視音樂」。有一段時間，佢地搞「＃本土主義」，唔播改編歌，只播原創。但叱咤十周年文藝晚會，最後贏得至尊歌既，係張學友既《每天愛你多一些》。唔播改編歌，令原創多左機會，會唔會令創作有進步呢？當時有好多人都話，咁樣會令競爭減少，質素會下降。
好啦，隔左好多年好多年，而家歌手係點生存既呢？睇到好多人話鄧小巧都好聽丫，live又穩定，點解冇份？ 唔……鄧小巧而家都仲好似需要屋企人幫忙頂住畀家用。大家有冇買佢唱片呢？我有。佢開唱片發佈會，係香港大學對面既 ethos ，佢既製作人冇同我打招呼，我一蚊都冇收過，開左一個facebook live。我果日仲做完節目飛車過去既。下次佢開show，我會抽時間睇，睇完我有感覺會寫評論。好啦，我又係咪撐緊人呢？對唔住，我唔識答。
仲有，而家歌手點賺錢既呢？你做kol 接廣告呀？又話你個面書「屌廣告黎既」。你開演唱會開得密呀？又話你搶錢啦。好啦，你唔開演唱會，唱片又唔賣啦，去賣魚蛋賣單酒，又話你淪落啦。大陸有機會啵，返大陸發展啦？喂阿哥，我唔供棲唔交租都要食飯架？使唔使養屋企？返左大陸，又話你投共啦。
