成日話守護平凡的幸福。現在香港人，可以有多幸福？
關於飯盒的事件，仍然有大量家長給我簡訊，我只可以說，我不小心打開了潘朵拉的盒子。當然，有人指斥我，說這樣子的事情，會阻止「派飯」的人，以後寧願把飯盒變垃圾，都不會在颱風天派飯。這種人，又是出了問題的：飯商寧願把剩下的飯變垃圾都不給你們試食，你就知平日給小孩吃的就是垃圾。
這樣簡單的道理大家也不明白嗎？
不是不明白，只是為拗而拗，為恨而恨，我最了解。香港人本來就是這樣子。他要不同意你，你呼吸都是錯。即使，有幾多人說，道理在我這一邊。
今日最爆，都係呢個故事。
有另一個家長就這樣說：
健吾San，關於小學生飯盒我都想講兩句。sorry我遲左，因為上星期帶左阿女去見識TGS2018，無好密咁追post，琴日返來先見到原來咁多人有共鳴。如果你覺得我阿女嘅經歷有趣，我唔介你share出來比大家睇。
我阿女兩年前升小一，我地兩公婆自己本身知阿女個咀好刁，我地一早預左要早起煮飯比阿女帶返學。點知我地太年少無知，原來肯早起都唔得，因為原來學校唔比學生自己拎飯盒返學！學校規定任何學生如果要食自家製飯盒，一定要由家人或傭工於早上11點帶到學校，然後待午飯後由家人將飯盒帶走。我地兩公婆都要返工，又唔忍心負責照顧阿女嘅婆婆幾十歲lunch time迫成個鐘車去學校送飯盒，唯有同阿女講要食學校飯盒。
返學幾日後，開始要返全日並留係學校食lunch，我地問阿女學校D飯好唔好食？阿女話好難食，食左幾啖無食，我問老師有無迫佢食，佢話有叫佢食多D，但阿女話佢真係放唔入口。後來幾日，婆婆話阿女日日一放學返黎就叫肚餓，仲可以一個人隊曬成個拉麵。我地再日日問佢有無食學校D飯，佢話一D都唔想食。
我初初以為細路肚餓更唔好食點都會食兩啖掛，點知過左幾日，我老婆收到學校電話，話阿女lunch原全係絕食！佢地話初初以為阿女好似其他小朋友咁只係扭下計，點知老師用盡所有辦法後(當然威迫利誘樣樣齊) ，阿女都只係不斷重覆同一個答案:「好難食！唔食！」而且重真係一D都唔食。學校無曬辦法，又怕真係會餓親阿女，只好打電話同我地商量，請求我自己帶飯！係呢個moment我老婆當然爆啦！我都唔知我老婆爆左D乜，總之事後，阿女嘅絕食行動加上老婆嘅大爆發，好成功咁打開左學校嘅缺口，學校話因為阿女個人嘅特殊情況，批準阿女自己拎飯盒返學(但必需係保暖盒，學校不提供翻熱服務) 。可能D同學仔見阿女可以自己帶飯返去同屋企人講，一傳十，十傳百咁，之後我地送阿女上校車返學時，見到逐漸多左好學生自己帶飯盒。最近，再正式問翻學校，對方答話年幾前已經開始改制比學生自己帶飯盒返學。
呢件事對我有好大嘅衝擊，我地兩公婆曾經因為一個authority嘅權威而接受一個唔適合阿女嘅安排，反而阿女嘅絕食行動話返比我地D大人知，有D自己接受唔到而且過左自底線嘅事，係應該堅持說「不」，力爭到底的！我事後覺得自己個女好有型！完！
這就是香港現在的狀況。香港人，對不公義的事情，就不發聲，以為不合理就是對小孩的訓練，給小孩受苦，小孩失去對味覺的認知，這樣子叫「樸實」嗎？
哈哈哈。好好笑。真係好好笑。究竟這一代人在想什麼？
