你可以即管不信。但我開始明白，為什麼學生對自己沒有要求。
我很簡單的：如果沒有人教他們「飲食應該有要求」，他們就可以沒有要求。對飲食都沒有要求的人，劣食有一搭沒一搭，怎會上進？老師看著學生吃屎有沒有所謂？沒所謂的。真的。因為，他們可以外出吃飯。
在香港，有一部份人可以有特權，其他人有事，有什麼問題？
有一個行內人，都忍不住把故事打出來給我：
～～～～～～～～～～～～～～～～～～～～～～～～～～～‘
大部分學校嘅飯商、食物部供應商都係聯合招標， 即係同一間供應商會做食物部同飯盒。
而甄選條件都大同小異。
食物部:價錢、種類為主 飯商:價錢、味道(家教會代表、學生）
其他：廚房/廠房設施地點、往績、應急機制、服務（早退退飯錢）等等。
有好多網友話係價低者得， 其實唔一定， 又唔係政府錢、學校錢， 只要家長代表認為價錢可以接受就得， 係唔係聽落還好呢？
但魔鬼在遴選機制。 學校A以家長、學生代表投票決定， 而大部分家長學生都係只睇試食當日嘅食物質素投票，而當日飯商都好揼本的，只有一兩間係真材實料拎當日飯盒去試食；。
學校B係將以上各項都（好on x)咁量化計分，最後，講到明唔隔夜而味道又比較好嗰間可能會低分過小食部食物種類多嗰間。
學校C係將各項（食物部、飯盒、服務）都排名次，揀名次最高嘅。
個人經驗學校C嘅機制選出嘅嘅飯商最少伏。
揀完之後，學校有責任監管飯商日常運作。 眼見大部份學校只要有飯嚟，飯係熟嘅，餸都係熟嘅，唔肚痛就得，咁就完全冇要求。 但其實可以有更高要求。
首先，要喺標書條款入手，設試用期，寫明如果校方不滿意，經過幾次反映而冇改善，有權一個星期通知更換飯商。此外，仲可以要求食物部（其實呢個先大伏，你啲仔仔女女年中都唔知食埋幾多陳年隔夜魚蛋燒賣）、飯盒都要即日煮等等。
我發夢見過（頭盔嚟架，你明就明啦）一間學校，知道學生返學咁辛苦，有餐好飯食係十分之重要嘅，所以佢學校嘅食物部，我唔敢講係五星級質素，但係真心係蔗渣價錢燒鵝質素。
唔准賣隔夜食物係基本野啦。 呢間學校係要求飯商定期推出新食品，例如芝士蛋糕、雞蛋仔、巨峰提子奶凍等等。而除咗每日有飯盒送來學校之外，食物部亦都會提供車仔麵、兩餸飯、日式便當。兩餸飯真係不得了，$22嘅價錢，果兩個餸講緊係魚香茄子配蒸水蛋，另外有炒菜，茶餐廳質素，再加一包紙包飲品，都只係$22咋。
學校對於食物部阿姐嘅要求係兩個：
環境：你屋企係咁得唔得呀?
食物：你會唔會比呢啲你啲仔女食呀?
同時，校長同好多老師係真係會食學校飯嘅，所以白烚冇味／生嘅椰菜一定過唔到關，佢嘅兩送飯係會配炒菜心、炒白菜仔，我真係一條黃嘅菜都冇見過。 係咁嘅要求之下，我相信邊間中標都會煮到好食又有營養嘅嘢出嚟（其實佢係行內出名最難食但又最有良心嗰間供應商），但係點解呢間學校可以咁把炮咁多要求？
因為學校隸屬大型辦學團體，間間供應商都驚畀佢blacklist，而校長老師都有心有力，對所有野都有要求。
講真，呢間學校嘅學生返學真係好期待食飯（老師都一樣）。
我依家喺一個比屎學生食嘅地方，我都陪佢哋一齊食屎，因為懶得出去。
我同學生講：我希望教出一啲見都唔合理嘅事情，識得反映、識得反抗嘅學生。喺可行嘅空間之下，我會建議佢哋帶飯、建議佢哋向食物部負責老師甚至校長反映。
好可惜，到咗呢個位就牽涉學校官僚偷懶文化，個個老師都出街食，根本冇人會理啲學生食屎定食飯。
政府唔管飯商、學校，而當學校上上下下無論校長、食物部同事定係其他同事甚至家長都覺得學生俾得十幾蚊，食屎都無所謂嘅時候，我真係…..
而亦不排除有老師係食屎大啦，佢地覺得啲飯味道可以，食，唔係個個識得有要求
最後都係正能量一點吧：但係食學校飯，真係可以鍛練意志，同埋教識我哋珍惜屋企人煮嘅飯，原來阿媽煮嘅都好好味呀。 我成日都覺得連學校飯都捱得過，呢個世界冇難關捱唔過㗎啦，無論前面遇到幾多困難我都能夠迎難而上，我相信我會變得更加堅毅不屈！
